ACTION REGIONALISTE CORSE – A.R.C. (AZZIONE REGIUNALISTA CORSA)

-->

Da u sittembre di u 1967 à u lugliu di u 1973 u muvimentu hà a so testera in francese -Action Régionaliste Corse – A.R.C.

L'A.R.C. si  crea, à u Cateraghju d'Aleria, u 3(trè) di u sittembre di u 1967.

L'insticatori ne sò, per a maiò parte, i membri di le Comité d'Etudes et de Défense des Intérêts de la Corse - C.E.D.I.C. chì cù l' Union Corse-Avenir-U.C.A è l'Union Nationale des Etudiants Corses-U.N.E.C.avianu urganizatu, in Corti, u 31 di u lugliu di u 1966, l' « Assises Regionales de la Jeunesse Corse » Assise Regiunale di a Ghjuventù Corsa chì danu in carica à una cummisione mista di crea u  Front Régionaliste Corse -F.R.C.

L'indiatura pulitica à manca di u F.R.C. garba pocu è muca  l'es membri di u C.E.D.I.C. chì da l'aostu di u 1966  sò in dirotta  cù u Fronte è a so duttrina.

I membri di l'A.R.C. sò per un muvimentu regiunalistu dettu « appuliticu » chì  ùn sarà mai sottututella di un muvimentu puliticu isulanu o naziunale.

Ma à l'andà si svelerà  chì a tendenza pulitica di l'A.R.C. hè  di diretta.

L'A.R.C. hè cumposta di ghjente di varii soli suciali:membri di prufessione liberale, picculi neguzianti, reprisentanti di cummerciu, osteriaghji chì facianu partita di  a C.G.I.C creata da Francesu Villanova, di l'agricultori di a piaghja orientale...

A scelta di l'A.R.C. si vole chjara:hè di dà priurità a l'azzione è di piglià pocu in contu i pinsamenti e rivendicazione è l'azzione di muvimenti o ghjente chì campanu for di l'isula chì per u più sò à u  bughju di i varii prubulema isulani è difatti a so analisi ùn pò esse chè sfurnata. L'inseme di e reflessione è di i travaglii devenu esse pinsati, sviluppati è difesi da ghjente o muvimenti chì camapanu in Corsa ; d'esse prisenti à l'elezzione ciò chì si farà à l'elezzione municipale di u ghjennaghju di u 1968 è di u marzu di u 1971, à l'elezzione cantunale di u sittembre di u 1967 è di u marzu di u 1970, à l'elezzione legislative di l'aprile di u 1968.

In pocu tempu l'A.R.C. hè u più impurtante muvimentu regiunalistu di l'Isula.

Per a sparghjera di e so infurnazione, di e so rivendicazione, di e so azzione l'A.R.C. dispone di un ghjurnalettu - ARRITTI - u primu numeru essendu esciutu à u dicembre di u 1966.

          U modu di funziunà hè :

- Statu stabilitu à l'adunita di a cummissione esecutiva di u 12 di u nuvembre di u 1966.

- Un cumitatu esecutivu cumpostu da 18 membri ; 8 ùn essendu chè i delegati di l'8 (ottu) rughjoni creati da l'esecutivu. Oblicu à issi 18 membri di campà à titulu permanente in Corsica. Ist'articulu di i statuti sarà mudificatu à l'assembleia generale di u 27 di u lugliu di u 1971 specificantu chì, oramai, i Corsi di fora ponu  esse eletti à u cumitatu esecutivu.

- Cuncolta di aderenti in sezzione locale.

- Cuncolta di i rispunsevuli di e varie sezzione di l' 8 (ottu) rughjoni cuncepiti da u cumitatu esecutivu in a spartera di a Corsica.

- Elezzione annuale di un Scagnu Esecutivu cumpostu di una duzina di membri chì facenu digià parte di u Cumitatu Esecutivu. U Scagnu Esecutivu hè cumpostu di:un Secretariu Generale è un Secretariu Aghjuntu, di un Tesurieru Generale è un Tesurieru Aghjuntu, l'altri membri essendu i capimachja di e principale cummissione : cummissione pulitica, agricula, culturale, d'internu, di prupaganda, di a ghjuventù...

- Un' assembleia o veduta generale annuale cù i militanti si farà à u  lugliu.

   E date ne sò : u 28 di u lugliu di u 1968, u 19 di u lugliu di u 1969, u 19 di u lugliu di u 1970, u 25 di u lugliu di u 1971, u 23 di u lugliu di u 1972, u 22 di u lugliu di u 1973.

- Un cungressu o adunata annuale si farà à a statina.

   E date ne sò : u 3 di u sittembre di u 1967, u 25 di l'aostu di u 1968, u 31 di l'aostu di u 1969, u 23 di l'aostu di u 1970, u 14 di l'aostu di u 1971, u 20 di l'aostu di u 1972.

 Ughjetti, rivendicazione è azzione prime :

  - Salvezza, rispettu, rinnovu è crescita  di l'etnia corsa.

  - Istituzione di a Corsica in Regione Autonoma cù un statutu particulare chì tene contu di a ghjente, a robba è l'ambiente ; dunque cun misure specifiche per u suciale, u culturale, l'ecunomicu, u finanziariu, l'agriculu, u demugraficu,u turisticu, i trasporti...

  - Perchì u puliticu è l'amministrativu lucale è moltu più u naziunale tenganu contu di isse rivendicazione varie azzione sò intraprese :

 - Adunite pulitiche, publiche, in Corsica è in Francia da a fine di u 1968, per a sparghjera è e spiagazione di isse varie riventicazione.

 - Prumuzione di a duttrina regiunalista in a pupulazione corsa di l'isula è di i scasati, studianti, l'amicale, associi...

- Impegni è iniziative in tutt'azzione intrapresa da o per i muvimenti socioprufessiunali di l'Isula: cummercianti; osteriaghji, automubilisti (vignetta), Agricultori (in u 1969) traspurtatori...

- Participazione à varie elezzione municipale, cantunale, legislativi.

- Capimachja di l'azzione prutestatarie in seguitu à a dichjarazione fatta, in u 1972, da u ministru, Poniatowski induv'ellu dice frà altru chì i Corsi « ont un chromosome de plus ...» anu un cromosomu in più. « Forse ci vole apparagunà à porci, u porcu corsu avendu un cariotipu sferente di quellu di i porci eurupei » (2n=38 cromosomi contru 2n=36cromosomi)!!!

- Urganizazione di i Stati Generali in u 1969 è u 1970.

- Participazione attiva, in u 1973, per a smessa di a lampera, da a sucietà taliana, Montedison, di prudotti chimichi, « Les Boues Rouges » i Fanghi Rossi, tossichi cuntenendu biossidi di titaniu, in u Mediterraniu  à vinti millia maritini di  a Giraglia di u Capicorsu.

(U 14 di u sittembre di u 1973, U Scarlino II, unu di i battelli chì lampava i franchi rossi fù plasticatu da un gruppu clandestinu corsu in u portu talianu di La Spezia.)

- Diffusione dopu a scuperta, in u 1971, di u raportu di l'Hudson Institute è, varie adunite per infurmazione è sensibilizazione di u populu cagione à u cuntenutu di issu raportu chì, in corte parolle, vole u sviluppu di « Una Corsica senza i Corsi ».

 

 E Persone e più fattive sò :

   - Massimu Simeoni, iniziatore di u muvimente è secretariu generale da u 1967 à u 1973, cù una smessa di qualchì mese in u 1970 rimpiazzatu da u fratellu Edimondu.

  - Gilbertu Casanova, secretariu generale aghjuntu da u 1967 à u 1973.

  - Lucianu Alfonsi, portaparulla di u muvimentu da u 1967 à u 1972.

  - Edimondu Simeoni, rispunsevule di varie cummissione (Ghjuvintù in u 1970), internu (in u 1969 è in u 1970) cù un intermezu, in u 1970, di Secretariu Generale.

  - Michele Castellani, Francescu Giuliani, Francescu Grimaldi, Ghjuvanni Mannarini, Ghjuvanni Ponteri, Anghjulumaria Renucci, Ghjambattista  Susini, Ghjamartimu Vadella...

 À Tene À Mente Qualchì Data Assignalata :

- U 24 di u sittembre di u 1967 : Edimondu Simeoni hè candidatu à e cantunale in Terra Vechja  di Bastia.

- U 18 di u nuvembre di u 1967 : Massimu Simeoni hè elettu secretariu Generale di l'A.R.C.

- U 7 di u ghjennaghju di u 1968 : l'A.R.C. prisenta à l'elezzione municipale di Bastia una lista cù a testera : Liste de Gestion Municipale.

- U 9 di u ferraghju di u 1968 : l'A.R.C. spantigheghja u Projet de Cadre Institutionnel pour un Statut Spécial Corse - Prughjettu di Quadru Istituziunale per un Statutu Speziale Corsu.

  - U 19 di u ghjennaghju di u 1969 : Lanciu da l'A.R.C. di una campagna nantu à u tema « La Corse Officielle et la Corse véritable » a Corsica Ufficiale è a Corsica Veritativa.

- U 29 di l'aprile di u 1969 : Dopu parechji tira è mola l'A.R.C. hè in favore à u NÒ per u referendomu nantu à a regiunalizazione.

- U 15 di u lugliu di u 1969 : U probulema di i tarreni di u vechju campu d'aviazione di Ghjisunaccia risorge, l'A.R.C s'impegna à latu à l'agricultori lucali chì i volenu sfruttà.

- U 13 di u sittembre di u 1969 : l'A.R.C. piglia l'iniziativa d'urganizà a prima adunata preparatoria di i « Etats Généraux - Stati Generali ».

- L'8 di u marzu di u 1970 : 6 candidati di l'A.R.C. si prisentanu à l'elezzione cantunale;

- U 18 di l'uttobre di u 1970 : I « Etats Généraux - Stati Generali » adottanu  una  rivendicazione  cun u scopu di dà à a Corsica un Statutu Particulare.

- L'8 di u marzu di u 1971 : Creazione à l'unversità di Nizza di una sezzione di l'A.R.C.

- U 14 di u marzu di u 1971 : Prisenza di liste di l'A.R.C. à l'elezzione municipale di Basta, Calvi è Ghisunaccia.

- U 14 di l'aostu di u 1971 : À a quinta adunata di l'A.R.C. In Corti, Michele Castellani spone u dramaticu prubulema di a Corsica rilativu à u « Naufrage de l'Ethnie Corse, voulu et froidement perpétré - Naufragiu di l'Etnia Corsa , vulsutu è cummessu  vuluntariamente è di manera spietata ».

- U 20 di u nuvembre di u 1971 : L'A.R.C. spanticheghja u cuntenutu di u raportu fattu da l'Hudson Institute.

- U 5 di u sittembre di u 1972 : Accolte publiche, cummunicati per via di i madia per prutestà di manera sullene contru i detti è scritti di u ministru, Poniatowski.

- U 26 di u nuvembre di u 1972 : Si crea in Bandol sottututella di l'A.R.C. U « Comité National de Vigilance et d'Action - C.N.V.A.C. - Cumitatu Naziunale di Vigilanza è d'Azzione ».

- U 7 di u ghjennaghju di u 1973 : I riprisentanti di l'A.R.C. - A Chjama di U Castellà in Castellare di a Casinca rifiutanu di firmà u manifestu.

- U 17 di u ferraghju di u 1973 : Cagione à u so impegnu in a lutta contru à i Fanghi Rossi è à e manifestazione sfrenate in Bastia, Edimondu Simeoni hè arrestatu.

- U 23 di u lugliu di u 1973 : L'Action Regionaliste Corse muta di testera in : Azzione per a Rinascita Corsa - A.R.C.