FEDERATION RENOVEE DES ETUDIANTS CORSES - Sud-Est FEDERAZIONE RINNUVATA DI I STUDIANTI CORSI - Sudest o Sciloccu F . R . E . C .

-->

U 10 di u maghju di u 1970 si crea in Nizza a « Fédération Rénovée des Etudiants Corses -FREC » Federazione Rinnuvata di i Studianti Corsi.

L'insticatori ne sò i studianti Corsi di tendenza regiunalista chì avianu creatu, cun l'appoghju di l'ARC è d'altri, u 23 di u marzu di u 1969 a « Fédération des Etudiants Corses » Federazione di i Studianti Corsi.

À u secondu cungressu, u 29 di u nuvembre di u 1969, u scagnu di a Federazione di i Studianti Corsi  hè messu in minurità da i membri di una  nuvella è dura tendenza indiata digià  ver di u naziunalismu.

  Simu in l'annate 70, annate dette di u riacquistu anzi tuttu culturale, l'ARC ùn si pò permette d'esse fordighjocu in e lutte stidiantesche. Per  ciò per difendele è difende e so tese regiunaliste è e rivendicazione avanzate da ella  è u FRC,  inizieghja ista nuvella federazione cun membri partigiani di a so duttrina.

Ista federazione di tendenza regiunalista ùn sterà tantu, dinù ella, à francà u passu ver di u naziunalismu.

Cum'è a Fédération des Etudiants Corses-FEC- Federazione di i Studianti Corsi, a maiò parte di  membri di a FERC sò studianti in Nizza.

Per a sparghjera di e so rivendicazione è azzione a FREC crea u ghjurnalettu, Causa Corsa.

  U Modu di Funziunà hè :

  - A federazione hè retta da a lege di  u 1u (primu) di u lugliu di u 1901 cumuna à tutt'associu o federazione.

  - A federazione hè divisa in duie sezzione : Nizza-Marseglia Ecchisi.

  - Una assembleia generale annuale in ogni sezzione  eleghje un Cunsigliu d'Amministrazione  di 15 membri.

  - Un Cumitatu Esecutivu  cumpostu di 14 membri, 7 per sezzione, scelti in u Cunsigliu d'amministrazione.

  Ughjettivi, Rivendicazione è Azzione Prime :

- Creazione in Corsica di un'università, altru e sezzione nurmale per alte funzione liberale o altru, sezzione specifiche per a furmazione di studianti per piglià in carica u sviluppu di a Corsica cun Corsi alti impiigati, capiservizii...

- Erezzione di a Corsica in Regione Autonoma, duttata di un statutu particulare :

- Culturale : insignamentu di a lingua corsa cum'è lingua regiunale, u corsu essendu esclusu di a lege Deixonne di u 1951 rilativa à l'insignamentu in e scole di e lingue regionale. A lingua è cultura corsa ùn sarà inserita à ista lege chè in u 1974.

- Economicu : cascia d'investimentu regiunale alimentata da l'ecunumie di i Corsi in varie banche.

- Agriculu

- A terra corsa à i Corsi.

- Demugraficu

- Salvezza, rispettu è rinnovu di l'etnia corsa.

- Turisticu

- Salvezza di l'ambiante; trasporti maritimi, aerei, stradali adatti.

- Altre rivendicazione di i varii muvimenti regiunalisti, di muvimenti sindicali, cummerciali...

   Per l'infurmazione è a sparghjera  u chì è u cumu di e varie rivendicazione varie azzione sò intraprese :

- Aduniti publiche.

- Manifestazione.

- Occupazione d'osterie universitarie è altri stabilimenti publichi.

- Cuncepitura è redazzione d'un raportu rilativu à l'università chersu da a Cummissione Culturale di u Cunsigliu Generale di Corsica.

    E Persone e più fattive sò :

  - Michele Castellani, Ghjuvanni Filippi, Alanu Spadoni, isti trè cun d'altri facenu perte di u primu Cumitatu Esecutivu;

  - Alanu Spadoni, presidente elettu di u secontu Cumitatu Esecutivu, hè aiutatu da:

Paulu Nebbia, Ghjuvandumenicu Poli, Ghjuvanpetru Rousseau, Vincente Stagnara, Petru Poggioli, Antone Sollacaro...

   À Tene à Mente Qualchì data Assignalata :

  - U 10 è u 16 di u maghju di u 1970 : e duie prime accolte in Nizza di a Federazione.

  - U 20 di u nuvemùbre di u 1970 : I partigiani à u Congressu di a Federazione, à  una magiurità rilativa, accettanu a celta di Corti per impiantà a futura università.

  - À u ferraghju di u 1971 : A federazione rimette à u Consigliu Generale di Corsu u raportu, da ellu dumandatu, rilativu a l'università.

  - U 14 di l'aprile di u 1971 : Una delegazione di a Federazione hà appuntamentu cù u ministru di l'educazione naziunale, Olivier Guichard.

  - L'1 è u 3 di u dicembre di u 1971 : l'osteria universitaria di Nizza hè occupata da i studianti, u 17 di u nuvembre di u 1974 : i stidianti di sintimu naziunalistu creanu in Nizza a Cunsulta di i Stidianti Corsi - CSC.