FRONT REGIONALISTE CORSE ( F . R . C . – Lugliu di u 1966 – Aprile di u 1973).

-->

U 31 di u lugliu di u 1966, in Corti, i membri di l’Union Corse-Avenir (UC-A) - L'unione Corsa-L'Avvene, di l’Union Nationale des Etudiants Corses (UNEC) - L'Unione Naziunale di i Studianti Corsi è di u Comité d’Etudes et de Défénse des Intérêts de la Corse (CEDIC ) - Cumitatu di Studii è di Difesa di l'Interessi di a Corsica aduniti in  l’Assises Régionalistes de la Jeunesse Corse (Assise Regiunaliste di a Ghjuvintù Corsa) chì danu in carica à una cummussione mista di creà u « Front Régionaliste Corse – FRC » (Fronte Regiunalistu Corsu).

Da l’aostu di u 1972 a denomina hè mutata in : FRC - Mouvement Populaire Anticolonialiste (Muvimentu Pupulare anticulunialistu).

E cagione di a creazione di istu nuvellu muvimentu sò varie :

- Fiascu di i muvimenti rivendicativi.

- Vuluntà di a ghjovana generazione di pigliassi in carica è di riunì e so forze pè a prumuzione di a suluzione regiunalista.

- Ancu, per certi, u desideriu di sazià e so ambizione pulitiche.

In u 1967 parechji membri di CEDIC sò in dirotta  cù u FRC è creanu l’ARC. Si face chì u FRC ùn hè più compostu chè d’anziani studianti:funziunarii, capiservizii, o di prufessione liberale è, a maiò parte, campendu in u reghjone pariginu.

Per fassi cunnosce è per a sparghjera di e so varie rivendicazione à azzione, u FRC s’appoghja nantu à dui ghjurnali :

          -L’UNION DE LA CORSE-l’AVENIR - aostu di u 1967 à aostu di u 1968;

U POPULU CORSU. U numeru 1 escerà in u maghju di u 1970.

U modu di funziunà hè :

- Dopu avè vutatu i statuti à l’aostu di u 1967, assumenu a direzzione un Secrètariat Général (Secretariatu Generale) è Commissions Techniques (Cummissione tecniche).

- A prima mudifica di i statuti si farà l’11 di l’aostu di u 1968, cù l’elezzione di un Exècutif Collègial (Esecutivu Cullegiale) cumpostu da 12  membri.

- A seconda mudifica di i statuti si farà l’8 di l’aostu di u 1970 cù l’elezzione di un Conseil Directeur (Cunsigliu Direttore- A Cunsulta) cumpostu di 15 membri.5 membri di  ista Cunsulta saranu eletti per primurassi di un Exécutif Collègial  (Esecutivu Cullegiale-A Ghjunta).

- Un Congrès Annuel (Cungressu annuale - A Veduta) hè previstu. Tutti ùn si faranu. Eccune e date di quelli chì si sò tinuti, pè u più in Corti : u 3 di l'aostu di u 1967 ; l’11 di l' aostu di u 1968 ; l’8 di l'aostu di u 1970 ; u 6 di l'aostu di u 1971 ; i 12 è 13 di l' aostu di u 1972 ; i 14 è 15 di l' aostu di u 1973.

Ughjettivi, rivendicazione è azzione prime :

E pruposte di u F.R.C. sò state publicate in u ferraghju di u 1967 in u ghjurnale : L’Union Corse.

Si pò leghje in u preambulu : « Notre doctrine se fonde sur une réalité:la région, et sur un principe guidant l’analyse:le système des clans et son corollaire,le colonialisme interne » : « A nostra duttrina s'inizieghja nantu à una realità:a regione, è nantu à a regula chì guida l'analisi:u sistena di i«clani»è u so curullariu, u culunialismu internu ».

E varie tappe per esce di istu sistema sò :

- Istituzione di a Corsica in Regione Autonoma postu chì hà un’unità organica, naturale è perfettamente definita in è so trè dimensione :

       - Dimensione socioculturale,

       - Dimensione giografica,

       - Dimensione ecunomica.

- Culunialismu internu : a situazione di a Corsica hè una situazione di tippu culuniale caratterizata da u sottusviluppu ecunomicu, puliticu, suciale è culturale.

U sfruttamentu di e so risorse naturale hè in manu di u gran capitale agrariu è finanziariu (Vigneti di a Costa Urientale…), à tecnichi furesteri…

U sistema clanicu sottumessu à e furmazione pulitiche naziunale chì preganu di Una Corsica senza Corsi.

- A regione hà da esse in manu à ghjente di u lucale capace di :

         - Esige a furmazione d’impiigati nustrali di direzzione;

         - Fà studii regiunali di u prubulema di redita.

         - Fà in sè chì u riimpiegu di l’ecunumie nustrale dipusitate in e banche sianu aduprate pè u sviluppu di a Corsica.

- Iste misure d’accomudu di l’istituzione, vale à dì :

          - Regione autonoma amministrativa.

          - Regione di prugramma autonomu è dispusizione adatte à prugetti regiunali.

          - Cascia d’investimenti regiunale; sò cherse à titulu di lege per u salvamentu di a Corsica.

    

Una planificazione di sviluppu à u serviziu di a Corsica è di i Corsi si farà in :

     - Investimenti d’infrastrutture (porti, strade, matrali..).

     - Investimenti industriali.

     - Pulitica agricula.

     - Cumunicazione è turismu.

     - Insignamentu.

     - Demugrafia.

     - Statutu fiscale…

Per chì iste rivendicazione è ughjettivi sianu purtati à bonavia e varie azzione  intraprese sò:

- Esciuta di u ghjurnalettu-POPULU CORSU.

- Urganizazione di assai accolte pulitiche.

- Iniziativi cumune cù i sindicati è i partiti pulitichi di manca, seguitu di a stratégie frontiste (strategia fruntista) aduttata da u 1970.

- Elaburazione è sparghjera di varii prugrammi : u capidopera essendu u libracciolu -Main Basse sur une Ile- Accademia di i Vagabondi -compiu di stampà u 30 di u Nuvembre di u 1970 da  l’Artigiani Stampadori – 20256 Curbara. A diffusione si farà à l’aprile di u 1971.

- L’indiatura maestra hè definita è specificata à l’epuca di l’accolta di u Castellara - A Chjama di u Castellà.

E persone e più fattive sò :

Carlu Santoni, Ghjulia Baldacci, Bernardu Benedetti, Ghjuvanni Geronimi, Alexis Govi, Ghjuvanni Leandri, Pasquale Marchetti, Lisandru Mondoloni, Ghjacunu Sansonnettu, Michele Sansonnetti ect…

À tene à mente qualchì data assignalata :

- D’aostu di u 1966 a spicchata di i membri di u C.E.D.I.C. addebulisce assai u F.R.C.

- Di ferraghju di u 1967 : publicazione di  e Propositions du F.R.C (pruposte di u F.R.C).

- Di ferraghju du u 1968 : u F.R.C. face soia a formula di prupaganda : Pas régionalisme sans socialisme, pas de socialisme sans régionalisme, (micca regiunalismu senza sucialismu, micca sucialismu senza regiunalismu).

- U 19 di l'aostu di u 1970 : u F.R.C. participeghja, in Santu Petru di Venacu, à una Journée unitaire progressiste corse (ghjurnata unitaria prugressista corsa ) cù u PSU, a CFDT, u MODEF…

- D’aprile di u 1971 : esciuta di u libru Main Basse sur  une Ile.

- Di dicembre di u 1971 : u F.R.C. prupone à i sindicati è à i partiti pulitichi di manca a cunstituzione di un Front Politique de Lutte contre le colonialisme Français (Fronte puliticu di lutta contru à u culunialismu francese).

- I 12 è 13 di l'aostu di u 1972 : A quinta Veduta di u F.R.C. avendu sceltu un rinforzu di a stratégie frontiste (strategia fruntista) u F.R.C. si muta in : Front Régionaliste Corse -Mouvement Populaire Anticolonialiste (Fronte Regiunalistu Corse-Muvimentu Pupilare Anticulunialistu).

- U 7 di u ghjennaghju di u 1973 : Accolta in Castellà .A maiò parte di i  participanti adottanu u testu di Carlu Santonu cunnusciutu sottu à denomina di : A CHJAMA DI U CASTELLÀ.

 - I 14 è 15 di l'aostu di u 1973 : u F.R.C. diventa u primu muvimentu autonumistu corsu di dopu guerra, è muta a so testera in : PARTITU di u POPULU CORSU (P.P.C.).

N.B. Istu muvimentu cumpostu di pochi militanti, a maiò parte in Parigi, è chì spessu (anu duie barrette) fendu parte di a Liga Cumunista è di u Partitu Sucialistu. Pattizeghjanu cù a Manca è a Strema Manca. Intraprendenu, siasi in Corsica,siasi in Francia, molte azzione rivendicative cù i sindicati d’operai è i partiti pulitichi di manca. U F.R.C. fù un centru di riflessione è un laboratoriu d’idee è spessu vanguardistu fendu una ghjusta analisi di u statu culuniale di l’Isula, di u fattu naziunale corsu, di un’autonumia interna…